上星期六，五彩戰士為咗刺激本土經濟，搞咗一個聖誕派對。雖然參加人數唔多，不過都玩得好開心。同場仲為粉紅戰士預祝生日添。
紅戰士每次見到我都有啲驚。好彩後尾好番啲。一對荔枝核眼，百變表情，全場四圍走，氹死成班姨姨。
雨點俠整個下午俾人抱來抱去，所以冇乜同佢影到相。因為佢阿媽（雪姑）之前食錯野，玩咗冇幾耐就自動技術性擊倒（KO）咗。可憐嘅雨點俠好彩有一眾姨姨睇住。而王子不愧係王子，一個人照顧兩個。之後早走帶雪姑去睇醫生。一個人要攞咁多野，我就自愧不如啦…
三包米俠神情有啲失落。因為佢送咗佢父王「宇宙大王」返宇宙（係佢母后自己講，我冇咁大膽。哈哈哈…）之後，由佢母后獨力帶到會場。母后（米太婆）真係厲害，果然訓練有素。
粉紅戰士雖然之前病病地，不過一招「美人眼光波」，仍然威力十足！今次仲要穿起粉紅戰衣，可愛到暈！
節瓜俠好明顯叉唔夠電。表現非常呆滯。玩咗一陣就去咗叉電。而熊貓俠進行二段變身，成為蒙面熊貓俠。（因為俾同事傳染咗傷風咳。）
除咗五彩戰隊之外，今次 Mavis 都有嚟。Mavis 好鐘意行樓梯，Koko 為咗唔俾佢知間餐廳有樓梯，所以專登走後門入嚟。笑死我。
除咗小朋友之外，我地仲有莎莉（及其朋友）、貓奴、同埋 Emilili。莎莉做咗駐場攝影師，成個下午影不停。而貓奴為咗抱住 Anson，搞到背脊傷上加傷。都叫咗佢抱多啲細細練習下㗎啦。
其實原本安排咗幾個遊戲同大家玩，不過班小朋友輪流休息，再加上雪姑不幸被技術性擊倒（KO）咗，所以只好取消。我覺得下次都係好次上一次去動植物公園咁，時間同安排都唔錯。做到想做嘅野之餘又舒服啲。
今次除咗慶祝聖誕，交換禮物之外，我地亦為米B慶祝生日。米B爸媽買來靚靚蛋糕一個，果然好襯米B。
之後一眾人為米B唱生日歌，祝願米B身體健康！
「我要切蛋糕啦。」
「米B，祝妳生日快樂，身體健康，越大越靚！」
我地玩到差不多六點半。照原定計畫，有能力嘅朋友，可以繼續去影燈飾。不過最後只得紅綠兩位戰士繼續去。
今年尖沙咀嘅燈飾都幾令人失望。唔係因為金融海嘯而縮水成咁呀？話晒啲商場都有收租㗎，唔係咁樣對啲租客呀？唉…
我地去咗海運大廈睇佢個「火車表演」。
然後就行咗去海邊睇「幻彩詠香江 」。兩樣都係冇乜野睇。
「好悶呀媽媽…」
海傍都幾凍同大風。我地因為要趕住返去婆婆屋企攞第二日嘅飯菜，所以都要走先。
雖然玩得好攰，不過可以見到一大班小朋友都好開心。希望快啲到下一次嘅聚會啦！
