當 Jayson 最愛嘅係米奇老鼠，今期我嘅最愛，一定係食蘋果大嘅：魔術老鼠（Magic Mouse）！
先來一幅三代同堂：
蘋果第一隻無線滑鼠（左），主打簡約。真係乜都冇，只得一粒掣，就係成隻滑鼠按落去。但耗電量都幾高，而且真係簡約得有點兒過份。
所以有第二代：Mighty Mouse（中）。中間多一粒軌跡球，方便碌上碌落，碌左碌右。而且雖然唔見佢有掣，但竟然都可以偵測你按邊到，做到雙鍵滑鼠嘅效果！但可惜，軌跡球好易藏垃圾，手汗加塵，好易令操作困難。雖然有方法清潔，但好難完全清理。
第三代：Magic Mouse，售價：HK$518。尋日忍唔住手買咗。感覺真係超一流。外型跟第一代一樣咁簡潔，但內涵就真係唔講得笑！
除咗同 Mighty Mouse 一樣，可以左右按之外，佢嘅表面仲係輕觸式 Multi-touch，代替軌跡球，唔怕藏垃圾。手指輕輕一掃，睇網頁就可以碌上碌落，真係好爽㗎！而且手感好舒服，敏感度好好，按落去有好實在嘅感覺。所以絕對係型人必備嘅滑鼠。
